रेल्वे प्रवासासाठी ऑनलाईन युनिव्हर्सल ट्रॅव्हल पास

@maharashtracity

महाराष्ट्र राज्य शासनातर्फे वेब लिंक उपलब्ध

मुंबई: सर्वसामान्य नागरिकांना घरातून कामाच्या ठिकाणी लसीकरण प्रमाणपत्राच्या आधारे रेल्वे प्रवास करण्यासाठी शासन, रेल्वे प्रशासन व मुंबई महापालिका यांच्या माध्यमातून ऑफलाईन रेल्वे पास देण्याची प्रक्रिया बुधवारपासून सुरू करण्यात आली आहे.

आता ऑनलाईन ई-पास (Online e-pass) ‘युनिव्हर्सल ट्रॅव्हल पास’ (Universal Travel Pass) सुविधादेखील महाराष्ट्र राज्य शासनामार्फत सुरू करण्यात आली आहे.
https://epassmsdma.mahait.org या लिंकच्या माध्यमातून ई – रेल्वे पास मिळविणे शक्य होणार आहे.

उपनगरीय रेल्वे स्थानकांवरील ऑफलाइन कोविड लसीकरण प्रमाणपत्र (covid vaccination certificate) पडताळणी प्रक्रिया आणि त्यासोबत ऑनलाइन ई-पास पद्धत देखील सुरु झाल्याने आता पात्र सर्वसामान्य नागरिकांना १५ ऑगस्टपासून रेल्वे प्रवास करणे सुलभ होणार आहे.

सध्या अत्यावश्यक सेवेतील ११ – १२ लाख कर्मचारी रेल्वेने प्रवास करीत असल्याचा अंदाज आहे. त्यामध्येही रेल्वे पास, रेल्वे तिकीट शिवाय, बोगस ओळखपत्र यांचा वापर करून अनेकजण रेल्वे प्रवास करीत आहेत. मात्र आता राज्य शासनाने ऑफलाईन व ऑनलाईन रेल्वे पास पद्धती कार्यान्वित केल्याने पास, तिकीट याशिवाय बोगस ओळ्खपत्राच्या आधारे प्रवास करणाऱ्या नागरिकांच्या प्रवासाला चाप बसणार आहे.

तसेच, राज्य शासनाने ऑनलाईन, ऑफलाईन रेल्वे पासबाबत लागू केलेल्या नवीन नियमानुसार लसीचे दोन डोस घेतलेल्या नागरिकांना लस घेतल्याच्या प्रमानपत्राच्या आधारे ऑफलाईन, ऑनलाईन रेल्वे पास मिळणार असून बोगस कागदपत्र, ओळखपत्र यांच्या आधारे रेल्वे प्रवास करणाऱ्या नागरिकांना किमान ५०० रुपये दंड करण्यात येणार आहे. त्यामुळे आता बेकायदेशीर प्रवास करणाऱ्या प्रवाशांची संख्या कमी होण्यास काहीशी मदतच होणार आहे.

सध्या लसीकरणाअंतर्गत दोन डोस घेतलेल्या किमान ९ लाखांपेक्षाही जास्त नागरिकांना रेल्वे प्रवास करण्याची संधी मिळणार आहे.

राज्य शासनाच्या मदत व पुनर्वसन विभागाने अत्यावश्यक सेवेमध्ये कार्यरत असणाऱ्या कर्मचारी आणि नागरिकांना ई-पास देण्यासाठी वेब लिंक यापूर्वीच विकसित केली आहे. या वेब लिंकचा उपयोग करून आता सर्वसामान्य मुंबईकर नागरिकांना देखील मुंबई उपनगरीय रेल्वे प्रवासासाठी ई-पास उपलब्ध होणार आहेत.

अत्यावश्यक सेवेतील कर्मचारी आणि नागरिकांसाठी वापरात असलेल्या वेब लिंकमध्ये महाराष्ट्र राज्य शासनाने सर्वसामान्य नागरिकांसाठी प्रवासाचा पास देण्याकरिता अतिरिक्त सुविधा उपलब्ध केली आहे.

https://epassmsdma.mahait.org ह्या लिंक चा उपयोग करून मुंबईकरांना आता युनिव्हर्सल ट्रॅव्हल पास मिळू शकतील. ही लिंक सर्व वेब ब्राऊजरवर उपलब्ध असेल. हा ई-पास मोबाईलमध्ये जतन (save) करुन, उपनगरीय रेल्वे स्थानकांवर तिकिट खिडकीवर सादर केल्यानंतर नागरिकांना रेल्वे प्रशासनाकडून थेट मासिक प्रवास पास उपलब्ध होईल. त्यामुळे रेल्वे स्थानकांवर पुन्हा ऑफलाईन पडताळणीची आवश्यकता राहणार नाही.

हेच नागरिक पात्र

या ई पास सुविधेनुसार, ज्या नागरिकांचे कोविड लसीचे दोन्ही डोस पूर्ण झाले आहेत आणि दुसरा डोस घेवून किमान १४ दिवस पूर्ण झाले आहेत, ते नागरिक या ई पाससाठी पात्र असतील.

जे पात्र नागरिक पाससाठी अर्ज करतील, त्यांचे कोविड लसीकरण पूर्ण झाल्याची (दुसरा डोस घेवून १४ दिवस पूर्ण झाल्याची) पडताळणी ह्या लिंकवर आपोआप होईल. त्यासाठी वेगळ्या मानवी कार्यवाहीची आवश्यकता राहणार नाही.

विशेष म्हणजे दुसरा डोस घेवून १४ दिवस पूर्ण न झालेल्या नागरिकांनी अर्ज केला तर त्यांना १४ दिवसांचा कालावधी पूर्ण झाल्यानंतरच ई-पास उपलब्ध होईल.

अशी आहे युनिव्हर्सल ट्रॅव्हल ई-पास पद्धती –

सर्वप्रथम पात्र नागरिकांनी https://epassmsdma.mahait.org ही वेब लिंक उघडावी. त्यावर Travel Pass for Vaccinated Citizens यावर क्लिक करावे. त्यानंतर नागरिकांनी आपला कोविड लसीकरणासाठी नोंदविलेलाच मोबाईल क्रमांक नमूद करावा. लगेचच मोबाईलवर ओटीपी अर्थात एकवेळ वापरासाठीचा पासवर्ड लघुसंदेश (एसएमएस) द्वारे प्राप्त होईल.

हा ओटीपी नमूद केल्यानंतर लाभधारकाचे नाव, मोबाईल क्रमांक, लाभधारकाचा संदर्भ क्रमांक इत्यादी तपशील आपोआप समोर दिसतील. त्यामध्ये ‘पास निर्माण करा’ (जनरेट पास) या पर्यायावर क्लिक करावे. त्यावर क्लिक करताच अर्जदाराचा तपशील तसेच कोविड लसीचा पहिला आणि दुसरा डोस घेतल्याचा दिनांक इत्यादी सर्व तपशील आपोआप दिसेल.

या तपशिलामध्ये सेल्फ इमेज’ या पर्यायामध्ये अर्जदाराने स्वतःचे छायाचित्र अपलोड करावे. मोबाईल गॅलरीतून छायाचित्र अपलोड करता येवू शकते किंवा मोबाईल कॅमेराद्वारे जागीच छायाचित्र (सेल्फी) काढून देखील अपलोड करता येईल.

ही सर्व प्रक्रिया पूर्ण झाल्यानंतर पुढील ४८ तासांमध्ये युनिव्हर्सल ट्रॅव्हल पास करीता लघुसंदेश (एसएमएस) द्वारे लिंक प्राप्त होईल, असा संदेश झळकेल. लिंक प्राप्त झाल्यानंतर ई पास मोबाईलमध्ये जतन (save) करुन, उपनगरीय रेल्वे स्थानकांवर तिकिट खिडकीवर सादर करावा, त्याआधारे रेल्वे पास प्राप्त करता येईल.