@maharashtracity
मुंबई: कोविड संसर्गाच्‍या (covid) संभाव्‍य तिसऱ्या लाटेचा सामना करण्‍यासाठी बृहन्‍मुंबई महानगरपालिका (BMC) सज्‍ज झाली आहे. अतिरिक्त महापालिका आयुक्त सुरेश काकाणी (Suresh Kakani) यांनी दोन दिवस पाहणी दौरा करुन आढावा घेतला. जम्बो कोविड सेंटर्ससह (Jambo Covid Centres) सर्व कोरोना काळजी केंद्रांमधील रुग्णशय्याही सुसज्ज ठेवण्यात आल्या आहेत. तर प्रत्येक रुग्णालय, वैद्यकीय महाविद्यालयासह जम्बो सेंटर्समध्‍येही लहान मुलांसाठी स्वतंत्र विभाग निर्माण करण्यात येत आहे. नागरिकांनी लहान मुलांची विशेष काळजी घ्‍यावी असे आवाहन महानगरपालिका प्रशासनाचे केले आहे.
मुंबई महानगरामध्‍ये कोविड-१९ विषाणू संसर्गाची पहिली व दुसरी लाट योग्‍यपणे थोपवून मुंबईकरांना सर्वोत्‍तम आरोग्य सुविधा देणाऱया बृहन्‍मुंबई महानगरपालिकेने कोविड-१९ च्‍या संभाव्‍य तिसऱ्या लाटेचा सामना करण्‍यासाठी तयारी केली आहे.
विविध रुग्‍णालये व भव्‍य कोविड उपचार केंद्र (जम्बो सेंटर) तसेच कोरोना काळजी केंद्रे (सीसीसी) यातील रुग्णशय्या सुसज्ज करुन उपचारांसाठी उपलब्ध आहेत. त्यासमवेत लहान मुलांसाठी देखील स्वतंत्र कक्ष सर्व रुग्‍णालये व वैद्यकीय महाविद्यालयांसह जम्बो सेंटर्समध्‍ये कार्यान्‍व‍ित करण्यात येत असून मुलांच्या उपचारांमध्ये कोणतीही कमतरता राहणार नाही, यासाठी विशेष दक्ष राहण्याच्या सूचना काकाणी यांनी आरोग्य प्रशासनाला दिल्या आहेत.
काकाणी म्‍हणाले, “महानगरपालिकेची विविध रुग्‍णालये, जम्बो कोविड सेंटर्स, कोरोना काळजी केंद्र १ (सीसीसी १), कोरोना काळजी केंद्र २ (सीसीसी २) यामध्‍ये कोविड बाधितांसाठी रुग्णशय्या सुसज्ज असून उपचारार्थ उपलब्ध आहेत. यामध्‍ये जवळपास २ हजार जीवरक्षक प्रणाली (व्‍हेंटिलेटर) रुग्णशय्या आहेत.”
वेगवेगळ्या जम्बो कोविड सेंटर्समध्‍ये पहिल्‍या टप्‍प्‍यामध्‍ये मिळून सुमारे ७ हजार ३०७ रुग्‍णशय्यांची क्षमता विकसित करण्यात आली. त्‍यावर जवळपास ७७ हजार रुग्‍णांवर उपचार करण्यात आले. आता जम्बो कोविड सेंटर्समध्‍ये दुसऱ्या टप्‍प्‍यामध्‍ये ८ हजार ३५० नवीन रुग्णशय्या क्षमता विकसित होण्‍याचे काम युद्धपातळीवर सुरु आहे. यात कांजूरमार्ग येथे २ हजार २००, मालाडमध्‍ये २ हजार २००, शीव येथे १ हजार २००, वरळी रेसकोर्स येथे ४५०, भायखळा येथील रिचर्डसन एण्‍ड क्रूडासमध्‍ये ७००, गोरेगांव नेस्‍को १ हजार ५००, वरळी एनएससीआय येथे १०० याप्रमाणे रुग्णशय्या क्षमता वाढवण्‍यात आली आहे.
जम्बो सेंटर्समधील रुग्णशय्या क्षमता एकूण १५ हजार ६५७ इतकी होत आहे. यातील ७० टक्‍के रुग्णशय्या या वाहिनीद्वारे प्राणवायू पुरवठा असणाऱ्या आहेत. प्रत्येक जम्बो कोविड सेंटरमध्‍ये द्रवरुप वैद्यकीय प्राणवायू साठवण टाक्‍या उपलब्ध आहेत. प्राणवायू सिलेंडर्स बॅकअपसह विविध रुग्णालयांमध्ये वातावरणातील हवेतून वैद्यकीय प्राणवायू उत्पादीत करणारी व्यवस्था उपलब्ध करुन देण्यात येत आहे. त्‍यामुळे प्राणवायूची अडचण नाही, असे काकाणी यांनी नमूद केले.
पुढे ते म्‍हणाले की, कोविड-१९ संसर्गाच्‍या अनुषंगाने उपचारांबाबत मार्गदर्शन करण्‍यासाठी आतापर्यंत तीन वेळा बालरोग तज्‍ज्ञांची कार्यशाळा घेण्यात आली आहे. मुलांच्या उपचारांमध्ये कोणतीही कमतरता राहणार नाही, याकडे विशेष लक्ष देत आहोत. तसेच, कोविड बाधित गरोदर मातांसाठी देखील स्वतंत्र कक्ष उभारण्‍यात आले असून त्‍यांची विशेष व्यवस्था केली जाणार आहे,
सद्यस्थितीत कोविडच्‍या दुसरी लाट ओसरली असली आणि कोविड प्रतिबंधक लसीकरण वेगाने सुरु असले तरी, सर्व मुंबईकर नागरिकांनी प्रतिबंधक नियमांचे योग्‍यरित्‍या पालन केले पाहिजे. लहान मुलांसह संपूर्ण कुटुंबाची योग्‍य काळजी घ्‍यावी, असे आवाहनही त्‍यांनी प्रशासनाच्‍यावतीने केले आहे.
