@masole_santosh
बनावट करोना लसीकरण प्रमाणपत्र वाटप भोवले
धुळे: अखेर बनावट कोरोना लसीकरण प्रमाणपत्र (fake corona vaccination certificate) वाटप प्रकरणात पोलिसांनी धुळे महानगरपालिकेच्या (Dhule Municipal Corporation) मुख्य आरोग्य अधिकाऱ्यांसह चौघांना अटक केली. यात एक डॉक्टर, एक परिचारक व कंत्राटी कर्मचाऱ्यांचा समावेश आहे.
या चौघांच्या अटकेमुळे या प्रकरणाचे गांभीर्य वाढले आहे. या प्रकरणात आणखी काही आरोपी निष्पन्न होण्याची शक्यता धुळे पोलिसांनी (Dhule Police) वर्तविली आहे.
महानगरपालिकेच्या (DMC) हद्दीतील एका शाळेत लसीकरण केंद्र (vaccination Center) दाखवून एका दिवसात तब्बल एक हजार 400 बनावट कोरोना लसीकरणाचे प्रमाणपत्र वाटप केल्याचा आरोप शिवसेनेने (Shiv Sena) केला होता. यातून पुढे चौकशीत तीन हजार 191 बोगस लसीकरणचे प्रमाणपत्र वाटप झाल्याचे समोर आले. यात सुमारे दोन कोटी रुपयांचा घोटाळा झाल्याची शक्यता वर्तविली जात आहे.
याप्रकरणी महापालिकेचे सहाय्यक आयुक्त नारायण सोनार यांनी पोलिसात तक्रार दिली होती. या तक्रारीची चौकशी शहर पोलीस ठाण्याचे पोलीस निरीक्षक नितीन देशमुख, हवालदार सतिष कोठावदे, राहुल सोनवणे यांनी सुरू केली. याच बनावट कोरोना लसीकरण प्रमाणपत्र वाटप प्रकरणी पोलिसांनी महानगरपालिकेचे आरोग्य अधिकारी डॉक्टर महेश मोरे (Dr Mahesh More) यांच्यासह डॉक्टर प्रशांत पाटील, परिचारक उमेश पाटील, कंत्राटी कर्मचारी अमोल पाथरे या चौघांना अटक केली आहे.
गेल्या काही दिवसांपासून शिवसेनेने या बोगस लसीकरण संदर्भात सातत्याने पाठपुरावा सुरु ठेवला होता. सत्ताधारी भाजप (BJP) पक्षाच्या नगरसेवकांनीही खऱ्या दोषींवर कारवाई करण्याची मागणी केली होती. माध्यमांचा आणि राजकीय पक्षांचा दबाव आल्यानंतर महानगरपालिकेने या प्रकरणी अज्ञात व्यक्तीविरोधात धुळे शहर पोलीस ठाण्यामध्ये गुन्हा दाखल केला होता.
