Twitter: @SantoshMasole
धुळे: मुंबई-आग्रा महामार्गावर असलेल्या पळासनेर (ता.शिरपूर) येथे सापळा रचून वागळे (ठाणे) पोलीसांच्या पथकाने एक संशयिताकडून एक मशिनगन, २० पिस्टल व २८० जिवंत काडतुस असा मोठया प्रमाणात अग्निशस्त्रसाठा जप्त केला. १० जुलै रोजी ही कारवाई झाली असून अटकेतील संशयितास १७ जुलै पर्यंत पोलीस कोठडीत ठेवण्याचे आदेश न्यायालयाने दिले आहेत.
उपलब्ध माहितीनुसार सुरजीतसिंग उर्फ माजा आवसिंग (वय २७ रा. मु. उमर्टीगाव पो. बलवाडी ता. वरला जि. बडवानी (मध्यप्रदेश) हा शस्त्र विक्री साठी पळासनेर (ता.शिरपूर) येथे येणार असल्याची गुप्त माहिती ठाणे गुन्हे शाखेचे (घटक ५) वरिष्ठ पोलीस निरीक्षक विकास घोडके यांना मिळाली होती. या आधारावर पोलिसांचे पथक १० जुलै रोजी पळासनेर तेथे पोहोचले होते.
मिळालेल्या गुप्त माहितीनुसार सुरजीतसिंग तिथे पोहोचला आणि पोलिसांनी त्याला पकडले. यावेळी केलेल्या अंग झडतीत त्याच्याकडे २० गावठी बनावटीचे स्टिल पिस्टल, १ गावठी बनावटीची मशिनगन, २ मॅग्झीनसह २८० जिवंत काडतुसे असा मोठया प्रमाणात अग्निशस्त्रसाठा सापडला.
पोलिसांनी त्याला ११ जुलै रोजीटक अटक केली व न्यायालयात हजर केले. न्यायालयाने त्यास १७ जुलै पर्यंत पोलीस कोठडीत ठेवण्याचे आदेश दिले आहेत.
पोलीस आयुक्त जयजित सिंग, पोलीस सह आयुक्त दत्तात्रय कराळे, अपर पोलीस आयुक्त (गुन्हे) पंजाबराव उगले, पोलीस उप आयुक्त राजेंद्रकुमार दाभाडे (गुन्हे, अतिरिक्त कार्यभार), पोलीस उप आयुक्त गुन्हे शिवराज पाटील, सहाय्यक पोलीस आयुक्त (शोध १) निलेश सोनावणे यांच्या मार्गदर्शनाखाली वागळे युनिट-५ ठाणेचे वरिष्ठ पोलीस निरीक्षक विकास घोडके, सहाय्यक
पोलिस निरीक्षक भुषण शिंदे व अविनाश महाजन यांच्यासह पथकातील अन्य सहकाऱ्यांच्या मदतीने ही कारवाई झाली.
