By Anant Nalawade
Twitter: nalavadeanant
मुंबई: महाराष्ट्राचे मुख्यमंत्री एकनाथ शिंदे यांना कागदी घोडे नाचवण्यात, फाईली फिरवण्यात अजिबात रस नाही. थेट एक कॉल आणि काम फत्ते, अशी त्यांची ख्याती झाली आहे. राज्याच्या आणि देशाच्या राजकारणात अर्धे शतक घालवलेले ज्येष्ठ नेते शरद पवार (Sharad Pawar) हे शिंदे यांच्या एक पाऊल पुढे आहेत. ते सत्तेत असो की नसो, त्यांच्या शब्दाला प्रशासनात किती मान आहे हे आज एका घटनेतून निदर्शनास आले.
मुंबई महानगर पालिकेच्या दवाखान्यात गेली कित्येक वर्षे इंटर्नशिप करणार्‍या निवासी डॉक्टरांच्या (Intern resident doctors) विद्यावेतनात ५० हजार रुपये वाढ व्हावी यासाठी बुधवारी बीएमसी मुंबई सीपीएस स्टुडंट असोसिएशनच्या निवासी डॉक्टरांनी राष्ट्रवादी काँग्रेसचे पक्षाध्यक्ष खा. शरद पवार यांची भेट घेत निवेदन दिले. पवार यांनी मुंबई पालिका आयुक्त इक्बालसिंग चहल (I S Chahal) यांना कॉल केला आणि या निवासी डॉक्टरांच्या विद्यावेतन ५० हजार करण्याची मागणी करताच आयुक्तांनी तात्काळ ५० हजार विद्यावेतन देण्याचे जाहीर केले.
मागील दहा ते पंधरा वर्षापासून मुंबई महानगर पालिकेच्या दवाखान्यात (BMC Hospitals) इंटर्नशिप करणार्‍या निवासी डॉक्टर विद्यार्थ्यांना फक्त पंधरा हजार एवढेच विद्यावेतन देण्यात येते. राज्यातील इतर ठिकाणी निवासी डॉक्टरांना ५० हजाराच्यावर विद्यावेतन मिळते. मागील वर्षी मुंबई मनपा फी आकारत नव्हती. मात्र यावर्षी एक लाख पंधरा हजार रुपये प्रत्येक इंटर्नशिप करणार्‍या विद्यार्थ्यांना आकारली आहे. हे निवासी डॉक्टर इतर डॉक्टरांप्रमाणे २४ तास सेवा देत आहेत. सध्या हे विद्यार्थी जी फी भरत आहेत तीच पगाराच्या रुपात त्यांना मनपा प्रशासन परत करत आहे. म्हणजे एमबीबीएस होऊन मुंबई मनपा दवाखान्यात २४ तास फुकट काम करुन घेतले जात आहे. नवी मुंबई, पुणे, पिंपरी-चिंचवड या महानगरपालिका विद्यार्थ्यांना ५० हजार रुपये पगार देत आहे. मग जगातील सर्वात श्रीमंत मुंबई महानगरपालिका या निवासी डॉक्टरांना इतका पगार का देत नाही असा सवालही या संघटनेने केला.
मुंबई मनपाच्या दवाखान्यात काम करणाऱ्या निवासी डॉक्टरांवर त्यांच्या घरांचीही जबाबदारी आहे. मात्र एवढ्या कमी पगारात काम करवून मुंबई मनपा अन्याय करत आहे असा आरोपही बीएमसी मुंबई सीपीएस स्टुडंट असोसिएशनने दिलेल्या निवेदनात केला. यावेळी संघटनेचे अध्यक्ष डॉ. अनिकेत मवाळ, डॉ. रोशन गायकवाड, डॉ. आदित्य मवाळ आदी प्रतिनिधींनी शरद पवार यांची भेट घेऊन निवेदन दिले.
