@maharashtracity
कोल्हापूर: गेल्या तीस वर्षांपासून भारतासह वीस पेक्षा अधिक देशात आयुर्वेदाचा प्रचार व प्रसार करणार्‍या वनौषधी विद्यापीठ संस्थेच्यावतीने आयुर्वेद क्षेत्रात विशेष लक्षणीय कार्य करणाऱ्या डॉक्टरांना सन्मानीत करण्यात आले.
दिल्ली व मुंबई येथील सुपर मल्टि स्पेशालीटी आयुर्वेदिक क्लिनिकचे डॉ. सुरेश भांडारकर (Dr Suresh Bhandarkar) यांना आयुर्वेद एक्सलन्स गोल्ड मेडल अवॉर्ड (Ayurveda Excellence Gold Medal Award) हा पुरस्कार देऊन गौरविण्यात आले.
वनौषधी विद्यापीठ या संस्थेच्यावतीने भारतीय आयुर्वेद परिषदेचे आयोजन कोल्हापुरातील (Kolhapur) हॉटेल सयाजी येथे केले होते. त्यावेळी गृहराज्यमंत्री सतेज पाटील (Satej Patil) यांच्या हस्ते डॉ. सुरेश भांडारकर यांचा सुवर्ण पदक, मानचिन्ह व सन्मान पत्र देऊन सन्मान करण्यात आला.
गेली सदतीस वर्षे डॉ. भांडारकर अनेक दुर्धर आजारांवर यशस्वीपणे उपचार करीत आहेत. आजवर अनेक राष्ट्रीय व आंतरराष्ट्रीय परिषदेत त्यांनी अनेक व्याख्याने दिली आहेत.
डॉ भांडारकर यांना आजपर्यंत योग (Yog) आणि आयुर्वेद क्षेत्रात अनेक पुरस्कार देऊन गौरविण्यात आले आहेत. त्यांना विदर्भ रत्न अवॉर्ड, महर्षी कुवल्यानन्द अवॉर्ड, राष्ट्रीय शिक्षक सम्मान, अमेरिकेत महर्षी अवॉर्ड, कोरोना वारीयर अवॉर्ड देऊन त्यांच्या कार्याचा गौरव करून सन्मानित करण्यात आले आहे.
नुकतेच ते आयुष मंत्रालय, नवी दिल्ली (Ayush Mantralaya) येथून सहायक निर्देशक (योग) या पदावरून सेवा निवृत्त झालेत.
या कार्य क्रमात डॉ. डी. वाय. पाटील विद्यापीठाचे कुलगुरू संजय पाटील, वरीष्ठ पत्रकार दिलीप लोंढे, वनौषधी विद्यापीठाचे संस्थापक डॉ. सुनील पाटील आदी उपस्थित होते.
